ஜே.வி.பி தமது கடந்த கால கொலைவெறி கலாச்சாரத்திலிருந்து இன்னும் திருந்தவில்லை. எதிர்காலத்திலும் மாறப்போவதில்லை என்பதை யாழ் முதன்மை வேட்பாளர் நடந்து கொண்ட விதம் தெளிவாக காட்டுகின்றது என தமிழ்த் தேசிய மக்கள் முன்னணியின் நாடாளுமன்ற வேட்பாளர் சுகாஸ் கனகரட்ணம் தெரிவித்தார்.
நேற்றைய தினம் சர்வகட்சிகளைச் சேர்ந்த யாழ் தேர்தல் மாவட்ட நாடாளுமன்ற வேட்பாளர்கள் கலந்துகொண்ட நிகழ்வில், கேள்வி கேட்ட சக வேட்பாளர்களை அச்சுறுத்தும் வகையில் தேசிய மக்கள் சக்தியின் முதன்மை வேட்பாளர் கருணாநாதன் இளங்குமரன் செயற்பட்டமை தொடர்பில் ஊடகவியலாளர்கள் எழுப்பிய கேள்விக்கு பதிலளிக்கும் போதே மேற்கண்டவாறு தெரிவித்தார்.
இது தொடர்பில் மேலும் தெரிவிக்கையில்,
தேசிய மக்கள் சக்தியானது அச்சுறுத்துகின்ற பாணியிலும், சபை நாகரிகத்துக்கு ஒவ்வாத வகையிலும் அரச அதிகாரம் தங்களுடைய கையில் இருக்கின்றது என்ற ஆணவத்தோடும் ஏனைய கட்சிகளையும் பொதுமக்களையும் மதிக்காத ஒரு ஜனநாயக அரசியலுக்கு ஒவ்வாத முறையில் அவர் நடந்து கொண்டார்.
இது ஜே.வி.பி தமது கடந்த கால கொலைவெறி கலாச்சாரத்திலிருந்து இன்னும் திருந்தவில்லை. எதிர்காலத்திலும் மாறப்போவதில்லை என்பதை தெளிவாக காட்டுகின்றது.
மேலும் யாழ்ப்பாணம் உட்பட வடக்கு, கிழக்கு மாகாணத்தில் நிறுத்தப்பட்டுள்ள வேட்பாளர்கள் ஜே.வி.பி முன்வைக்கின்ற கொள்கை நிலைப்பாடுகளுக்கோ அல்லது இலஞ்சம் ஊழல்களை ஓழிப்பதற்கோ தகுதியானவர்கள் அல்ல. ஏனெனில் நிறுத்தப்பட்டுள்ள வேட்பாளர்கள் பலருடைய மறுபக்கம் அவர்களுடைய கொள்கை நிலைப்பாட்டுக்கு முற்றிலும் எதிரானது.
ஒரு பொது வெளியில் ஏற்பாட்டாளர்கள், பொதுமக்கள், பிற கட்சி வேட்பாளர்கள் முன்னிலையில் ஜே.வி.பியின் முதன்மை வேட்பாளர் நடந்து கொண்ட விதம் ஒரு அபாய சங்கை ஊதி நிற்கின்றது.
ஒரு ஜனாதிபதி பதவியை வைத்துக் கொண்டே இந்த அளவு ஆட்டம் ஆடுகின்ற ஜே.வி.பிக்கு நாடாளுமன்ற அதிகாரமும் கிடைக்கப்பெற்றால் எவ்வளவு தூரம் சர்வாதிகாரமாக செயற்படுவார்கள் என்பதற்கு இன்றைய மக்கள் அரங்கம் சாட்சியாக அமைந்துள்ளது.
இதனை நாங்கள் வன்மையாக கண்டிக்கின்றோம். தமிழ் மக்கள் சிந்தித்து தென்னிலங்கை கட்சிகளுக்கு வாக்களிக்கக் கூடாது இப்படியானவர்களுக்கு வாக்குகளால் ஒரு பதிலடி வழங்கி தமிழ் மண்ணில் இருந்து விரட்டி அடிக்க வேண்டும், என்றார்.
